मुंबई (Mumbai) : हिंदुहृदयसम्राट बाळासाहेब ठाकरे महाराष्ट्र समृद्धी महामार्गाच्या (Hindu Hrudaysamrat Balasaheb Thackeray Maharashtra Samruddhi Mahamarg) पहिल्या टप्प्याचे लोकार्पण पुढे ढकलण्यात आले आहे. येत्या 2 मे रोजी नागपूर ते सेलू बाजार (Nagpur - Selubajar) या 210 किलोमीटरच्या टप्याचे लोकार्पण राज्याचे मुख्यमंत्री उद्धव ठाकरे (CM Uddhav Thackeray) यांच्या हस्ते करण्यात येणार होते. त्यानंतर हा टप्पा सर्वसामान्यांसाठी खुला करण्यात येणार होता.
नागपूर-मुंबई 710 किलोमीटरचा सहा लेन असलेल्या हिंदुहृदयसम्राट बाळासाहेब ठाकरे महाराष्ट्र समृद्धी महामार्गाची उभारणी सुरू आहे. त्यातीलच नागपूर ते सेलूबाजार या पहिल्या टप्याचे लोकार्पण करण्यात येणार होते. मंत्री एकनाथ शिंदे यांनी शुक्रवारी पहिल्या टप्याची पाहणी करून २ मे रोजी लोकार्पणाची घोषणा केली होती.
महामार्गाच्या लगत वन्यप्राण्यांसाठी महामार्गावर अंडरपास आणि ओव्हरपास रस्ते बांधण्यात आले आहेत. दोन्ही मार्गावर जंगलासारखे वातावरण तयार केले असून, वन्यप्राण्यांचे संरक्षण करण्यास मदत होणार आहे.
नागपूर ते सेलूबाजार या पहिल्या टप्यात वन्यजीव उन्नत मार्गाचे काम प्रगतीपथावर आहे. या उन्नत मार्गाचे सुपर स्ट्रक्चर हे आर्च पद्धतीचे आहे. हे काम ३० एप्रिलपर्यंत पूर्ण होणे अपेक्षित होते. हे काम अंतिम टप्प्यात असताना त्यातील १०५ पैकी काही आर्च स्ट्रीप्सना अपघातात हानी पोहोचली आहे. तज्ज्ञांसोबत पाहणी आणि चर्चा करून नवीन पद्धतीचे सुपर स्ट्रक्चर बनवण्याचा निर्णय घेण्यात आला आहे. त्यासाठी दीड महिन्यांचा कालावधी आवश्यक आहे.
वन्यजीव उन्नत मार्ग पूर्ण झाल्याशिवाय महामार्ग वाहतुकीसाठी खुला करता येणार नाही. त्यामुळे हिंदुहृदयसम्राट बाळासाहेब ठाकरे महाराष्ट्र समृद्धी महामार्गाच्या नागपूर ते सेलूबाजार या पहिल्या टप्याचे लोकार्पण पुढे ढकलण्यात आल्याचे महाराष्ट्र राज्य रस्ते विकास महामंडळाने कळवले आहे. या संपूर्ण समृद्धी महामार्गाचे काम डिसेंबर 2023 पर्यंत पूर्ण करण्यात येणार आहे.
दरम्यान, आधीच्या नियोजनानुसार १ मे रोजी महाराष्ट्र दिनी या महत्त्वाकांक्षी प्रकल्पातील नागपूर ते शिर्डी मार्गाचे लोकार्पण करण्याची राज्य सरकारची इच्छा होती. परंतु विधानसभेतील विरोधी पक्षनेते देवेंद्र फडणवीस यांनी याला विरोध केला. त्यांचे म्हणणे काम पूर्ण झाल्यावरच लोकार्पण व्हावे. राज्य सरकार केवळ श्रेय लुटण्यासाठी घाईगडबडीत लोकार्पण करीत असल्याचा त्यांचा आरोप आहे. दुसरीकडे एमएसआरडीसीच्या मुंबईत गेल्या आठवड्यात पार पडलेल्या बैठकीत प्रकल्पाच्या कामांचा आढावा घेण्यात आला.
सूत्रांचे म्हणणे आहे की, नागपूरपासून शिर्डीपर्यंतच्या ५२० किमी महामार्गाचे ९५ टक्के काम पूर्ण झाले आहे. हे काम २०२१ मध्ये पूर्ण व्हायला हवे होते. परंतु कोविड संक्रमणामुळे काम पूर्ण होऊ शकले नाही. त्यानंतर काम पूर्ण करण्याची कुठलीही डेडलाईन देण्यात आली नाही. वाशिम व बुलडाणा जिल्ह्यातील पुलांचे कामही पूर्ण होऊ शकलेले नाही. हे काम पूर्ण होण्यास अजूनही काही महिने लागणार आहेत. दुसरीकडे नागपुरातील शिवमडकापासून १० ते २० किमी अंतरावरील कामे अजूनही पूर्ण झालेली नाहीत. हे काम करणाऱ्या मेघा इंजिनिअरिंग ॲंड इन्फ्रास्ट्रक्चर लि. शी संबंधित सूत्रांचे म्हणणे आहे की, काम गतीने होत आहे. परंतु ज्या ठिकाणी महामार्गाला वर्धा मार्ग पार करायचा आहे, तेथील काम अजूनही शिल्लक आहे.
