नाशिक (Nashik) : जिल्हा परिषदेच्या १०३८ रिक्त पदांच्या २० संवर्गातील भरतीसाठी तब्बल ६४०८० अर्ज आले आहेत. यात कंत्राटी ग्रामसेवकांच्या ५० जागांसाठी तब्बल ११७२८ व आरोग्य सेवकांच्या ८५ जागांसाठी १७५५९ अर्ज आले आहेत. या भरतीसाठी जिल्हा परिषदेने ५ ऑगस्टला जाहिरात प्रसिद्ध केली होती. ही परीक्षा घेण्यासाठी शासनाने आयबीपीएस या कंपनीची नियुक्ती केली आहे. या कंपनीकडे उपलब्ध असलेल्या वेळेनुसार परीक्षांचे आयोजन केले जाईल, अशी माहिती सामान्य प्रशासन विभागाचे उपमुख्य कार्यकारी अधिकारी रवींद्र परदेशी यांनी दिली.
अनेक वर्षांपासून जिल्हा परिषदेच्या सर्व रिक्त पदांची भरती होणार अशी चर्चा होती. मात्र, वेगवेगळ्या कारणांमुळे या परीक्षा टळत गेल्या. सरकारने जिल्हा परिषदेच्या आरोग्य विभागातील भरती प्रक्रिया २०१९ मध्ये राबवली.मात्र, या भरती प्रक्रियेला दोनदा मुदतवाढ मिळाल्यानंतर सरकारने ती परीक्षाच रद्द केली होती. आता स्वातंत्र्याच्या अमृत महोत्सवी वर्षानिमित्त राज्य सरकारने ७५ हजार पदांची भरती करण्याचे जाहीर केले होते. त्यानुसार राज्यातील जिल्हा परिषदांमधील १९ हजार पेक्षा अधिक पदांची भरतीस मान्यता दिली आहे. नाशिक जिल्हा परिषदेच्या २० संवर्गांची जवळपास दोन हजार पदे रिक्त असून त्यापैकी १०३८ पदांची भरती प्रक्रिया सध्या जिलहा परिषदेमार्फत राबवली जात आहे. जिल्हा परिषदेच्या सामान्य प्रशासन विभागाने दिलेल्या माहितीनुसार या पदांसाठी ६४ हजार ८० अर्ज आले आहेत.
संवर्गानिहाय आलेले अर्ज
पद जागा अर्ज संख्या
ग्रामसेवक (कंत्राटी) ५० ११७२८
आरोग्य पर्यवेक्षक ३ ९१
आरोग्य परिचारिका ५९७ ३९५४
आरोग्य सेवक (पु.) ८५ १७५७९
आरोग्य सेवक १२६ ६४८८
औषध नि.अधि. २० ५०५७
प्र. तंत्रज्ञ १४ २६०७
विस्तार अ. (सां) २ ३३७
विस्तार अ.(शि.) ७ १०४७
व. सहायक ३ १७७३
पशु. पर्यवेक्षक २८ ७७४
क. आरेखक २ ४१
क. लेखा. १ ४८
क. सहा (लेखा) ५ ८६३
क. सहाय्यक (लिपीक) २२ ६६७
कनिष्ठ यांत्रिकी १ ४४
क.अभियंता (स्था.) ३४ ५२६८
स्थापत्य सहा. ३३ २९४२
लघुलेखक १ ९५
परीक्षेची संपूर्ण भरती प्रक्रिया शासनाने मान्यता दिलेल्या आय.बी.पी.एस. या कंपनीमार्फत राबविण्यात येत आहे. त्यामुळे परीक्षा अत्यंत पारदर्शक व काटेकोर पद्धतीने होणार आहे. यामुळे फसवणूकीपासून उमेदवारांनी दक्षता घ्यावी व कोणत्याही प्रलोभनास बळी पडू नये. कोणतीही व्यक्ती परीक्षेसंदर्भात आर्थिक मागणी करीत असल्याचे निदर्शनास आल्यास त्यांच्याविरुद्ध जवळच्या पोलीस स्टेशनमध्ये तक्रार दाखल करण्यात यावी.
- अशिमा मित्तल, मुख्य कार्यकारी अधिकारी, जिल्हा परिषद नाशिक.