मुंबई (Mumbai) : मुंबई-गोवा महामार्गाच्या (Mumbai-Goa Highway) पळस्पे ते इंदापूर मार्गाचे आता काँक्रिटीकरण केले जाणार आहे. यासाठी साडेसातशे कोटी रुपयांचा निधी केंद्र सरकारकडून (Central Government) उपलब्ध करून दिला जाणार आहे. गेल्या बारा वर्षांपासून या टप्प्यातील महामार्गाच्या कामाची रखडपट्टी सुरू आहे.
२०१० मध्ये मुंबई-गोवा माहामार्गाच्या पळस्पे ते इंदापूर या ८४ किलोमीटर लांबीच्या रस्त्याच्या चौपदरीकरणाला मंजुरी देण्यात आली. बांधा वापरा आणि हस्तांतरित करा या योजनेतून रस्त्याचे काम २०११ मध्ये प्रत्यक्ष सुरू झाले. हे काम बारा वर्षांनंतरही पूर्ण होऊ शकलेले नाही. दरवर्षी पावसाळ्यात होणाऱ्या रस्त्याच्या दुरवस्थेमुळे कोकणातील प्रवाशांचे हाल होत आहेत. ही बाब लक्षात घेऊन खासदार सुनील तटकरे यांनी पळस्पे ते इंदापूर महामार्गाचे उर्वरित इंदापूर ते झारापप्रमाणे काँक्रिटीकरण करावे, अशी मागणी केली होती. ही मागणी लक्षात घेऊन केंद्रीय भूपृष्ठ वाहतूक आणि दळणवळणमंत्री नितीन गडकरी यांनी पळस्पे ते इंदापूर या मार्गाच्या काँक्रिटीकरणाला मंजुरी दिली आहे. यासाठी साडेसातशे कोटी रुपयांचा निधी केंद्र सरकार उपलब्ध करून देणार आहे. पहिल्या टप्प्यात कासू ते इंदापूर या ४२ किलोमीटर मार्गाचे काँक्रिटीकरण होणार असून, त्यासाठी ४४० कोटी रुपयांचा खर्च अपेक्षित आहे. हे काम टेंडर प्रक्रिया पूर्ण झाल्यावर लवकरच सुरू होणार आहे.
महामार्गाच्या पळस्पे ते वडखळ मार्गाचे चौपदरीकरण जवळपास पूर्ण झाले आहे. मात्र वडखळ ते इंदापूर दरम्यान रस्त्याचे काम जवळपास ठप्प आहे. नागोठणे ते वाकण फाटादरम्यान रस्त्याची दुरवस्था कायम आहे. कोलाड परिसरात रस्त्याची कामे झालेली नाहीत. त्यामुळे रस्त्यावर दुतर्फा पुन्हा एकदा अतिक्रमणे झाल्याचे पाहायला मिळत आहे. इंदापूर येथे रस्त्याचे रुंदीकरण झाले नसल्याने वाहतूक कोंडीची समस्या आहे.
पळस्पे ते इंदापूर दरम्यानच्या रस्त्याची मोठ्या प्रमाणात दुरवस्था झाली आहे. माणगाव ते पोलादपूर मार्गाची परिस्थिती फारशी चांगली नाही. महामार्गावर वाहतूक सूचना फलक बसविण्यात आलेले नाहीत, रस्त्यावर व्हायब्रेशन्स जाणवत आहेत. खड्डे योग्य प्रकारे भरण्यात आलेले नाहीत. सर्व्हिस रोडची कामे अद्याप अपूर्ण आहेत. पाण्याचा निचरा होण्यासाठी योग्य व्यवस्था करण्यात आलेली नाही. अनेक ठिकाणी रस्त्याला भेगा पडल्याचे दिसून येत आहे. त्यामुळे रस्त्याचे त्रयस्थ संस्थेकडून ऑडिट करणे आवश्यक आहे, असा अहवाल कोर्ट कमिशनने न्यायालयाला सादर केला आहे.
पळस्पे ते इंदापूर या महामार्ग चौपदरीकरणाच्या कामाला २०११ मध्ये सुरवात झाली. त्यावेळी हा रस्ता डांबरीकरणातून करण्याचा निर्णय घेण्यात आला. सुप्रीम इन्फ्रास्ट्रक्चरला हे काम देण्यात आले होते. सुरवातीला भूसंपादनातील अडचणीमुळे कामाला उशीर झाला. नंतर कर्नाळा अभयारण्यातून महामार्ग जात असल्याने पर्यावरण विभागाच्या परवानगीसाठी काम थांबवावे लागले. नंतर ठेकेदार कंपनी दिवाळखोरीत निघाली. बँकानी पतपुरवठा करण्यास नकार दिला. त्यामुळे दुसरा ठेकेदार घेऊन काम करून घेण्याची वेळ आली. यासारख्या कारणांमुळे प्रकल्पाचे काम रखडले. या प्रकल्पासाठी २७५ हेक्टर जागा संपादित करण्यात येणार होती. २०१० मध्ये भूसंपादन प्रक्रिया सुरू झाली ती अजूनही पूर्ण झाली नसल्याचे केंद्रीय मंत्री नितीन गडकरी यांनी सांगितले.
या प्रकल्पाने मला आणि कोकणवासीयांना खूप त्रास दिला आहे. लोकांच्या रोषाला सामोरे जावे लागले आहे. पण अठरा हजार कोटींच्या या प्रकल्पातील ११ पैकी ९ टप्प्यांच्या कामांना गती मिळाली आहे. उर्वरित दोन टप्प्यातील अडचणी होत्या त्यांचे निराकरण झाले आहे. त्यामुळे रस्त्याचे काम वर्षभरात पूर्ण करण्याचा प्रयत्न राहील.
- नितीन गडकरी, केंद्रीय मंत्री
पावसाळ्यात दरवर्षी पळस्पे ते इंदापूर मार्गाची मोठ्या प्रमाणात दुरवस्था होत होती. कोकणात जाणाऱ्या प्रवाशांचे हाल होत होते. त्यामुळे इंदापूर ते झारापप्रमाणे पळस्पे ते इंदापूर मार्गाचे काँक्रिटीकरण करावे, अशी विनंती मी केली होती. आता हे काम सुरू होत असल्याने कामाला गती मिळू शकेल. हे काम दिलेल्या वेळेत पूर्ण होईल यासाठी पाठपुरावा सुरू राहील. इंदापूर, माणगाव येथील बाह्यवळण रस्त्यांची कामेही तातडीने सुरू व्हावीत अशी अपेक्षा आहे.
- सुनील तटकरे, खासदार