नागपूर (Nagpur) : नागपूरकरांसाठी महत्त्वपूर्ण मानली जाणारी नागभीड लाईनची (Nagbhid Railway Line) प्रतीक्षा आता संपणार आहे. स्टेट बोर्ड ऑफ वाइल्ड लाईफ कडून या लाईनला परवानगी मिळाली आहे. नुकतीच ही फाईल एनबीडब्ल्यूकडे परवानगीसाठी पाठवण्यात आली आहे, ज्याला महिनाभरात संमती मिळण्याची अपेक्षा अधिकाऱ्यांना आहे. त्यामुळे उमरेड ते नागभीड दरम्यान धावणाऱ्या कामाला गती मिळणार आहे.
17 किलोमीटर एलिव्हेटेड लाईन
वर्षापूर्वी इतवारी ते नागभीड अशी छोटी लाईन होती, तिचे महारेल्वेद्वारे ब्रॉडगेजमध्ये रूपांतर करण्यात आले. मात्र वनविभागाच्या जागेमुळे उमरेड ते नागभीड दरम्यान कामाचा वेग मंदावला आहे. या भागात लाईन टाकल्याने वन्यप्राण्यांसाठी समस्या निर्माण होऊ शकतात. त्यासाठी ही लाईन 17 किलोमीटर एलिव्हेटेड करण्यात येणार आहे.
जमिनीपासून सुमारे 10 ते 12 फूट उंचीवर रेल्वे ट्रॅक बांधण्यात आल्याने वन्यजिवांना कोणतीही अडचण येणार नाही. वन्यप्राणी रुळाच्या खालून येणे-जाणे करू शकतील. त्याची परवानगी राज्य वन्यजीव मंडळाने नुकतीच दिली आहे. आता ही फाईल नॅशनल बोर्ड ऑफ वाइल्ड लाईफकडे पाठवण्यात आली आहे. महिनाभरात परवानगी मिळणे अपेक्षित असून, त्यानंतर वनपरिक्षेत्राचे काम वेगाने केले जाईल.
डिसेंबरपर्यंत पूर्ण होणार सेक्शन
इतवारी - नागभीड लाईन अनेक वर्षापासून बंद आहे. वारंवार अतिक्रमण आणि वनविभागाच्या जमिनींमुळे रेल्वे रुळ टाकण्यात अडथळे येत होते. मात्र आता त्याला गती मिळणार आहे. उन्नत मार्ग पूर्ण करण्याचे आव्हान महारेलसमोर आहे. या मार्गावर इतवारी ते उमरेड मार्गाचे काम वेगाने सुरू आहे. अधिकाऱ्यांनी दिलेल्या माहिती नूसार डिसेंबरपर्यंत हा मार्ग पूर्ण झाल्यानंतर गाड्या सुरू होतील.
24 छोटे पूल...
महारेल नागपूरचे ग्रुप जनरल मॅनेजर डीआर डॉ. टेंभुर्णे यांनी सांगितले की, त्यांना सरकारकडून परवानगी मिळाली आहे. आता ही फाईल राष्ट्रीय वन्यजीव मंडळाकडे गेली आहे. येथूनही लवकरच ग्रीन सिग्नल अपेक्षित असून, त्यानंतर लवकरच उन्नत रस्ता बनविण्याचे काम सुरू होईल. हा उन्नत रस्ता 7 मोठ्या संरचनेवर बांधला जाईल. त्यात सुमारे 24 छोटे पूल असतील.