मुंबई (Mumbai) : नवीन वीजमीटरच्या उपलब्धतेमध्ये आणखी वाढ करण्याचा निर्णय महावितरणने (Mahadiscom) घेतला आहे. त्यानुसार सप्टेंबर पर्यंत तब्बल 15 लाख नवीन वीजमीटरचा पुरवठा करण्याचा आदेश पुरवठादारांना देण्यात आला आहे. यामुळे 30 एप्रिलपर्यंत एक लाख आणि मे महिन्यात दोन लाख नवीन वीजमीटर उपलब्ध होणार आहेत. तर जून ते सप्टेंबरपर्यंत प्रत्येक महिन्यात 3 लाख 27 हजार 500 मीटर उपलब्ध होत जाणार आहेत.
महावितरणकडून दरवर्षी सुमारे 8 ते 9 लाख नवीन वीजजोडण्या कार्यान्वित करण्यात येतात. सोबतच नादुरुस्त व इतर कारणांमुळे मीटर बदलणे आदींसाठी महावितरणला दरमहा 2 लाख मीटरची आवश्यकता भासते. सद्यस्थितीत 22 एप्रिलपर्यंत महावितरणच्या क्षेत्रीय कार्यालयांमध्ये 1 लाख 31 हजार 802 मीटर उपलब्ध आहेत. या व्यतिरिक्त दहा लाख स्मार्ट मीटर खरेदीची टेंडर प्रक्रिया सुरू आहे. 1.50 लाख थ्रीफेज मिटर घेण्याची प्रक्रिया अंतिम टप्प्यात असून या थ्रीफेज मिटरचा पुरवठा येत्या मे अखेरपर्यंत उपलब्ध होणार आहे.
ग्राहकांची वाढती मागणी बघता आणखी 20 लाख सिंगल फेज मिटर घेण्याची प्रक्रिया सुरू करण्यात आलेली आहे. शिवाय वीज नियामक आयोगाच्या निर्देशानुसार कृषी वाहिन्यांचे ऊर्जा अंकेक्षण करण्यासाठी उच्चदाब वीज वितरण प्रणाली अंतर्गत वीजजोडणी दिलेल्या कृषी ग्राहकांना प्रिपेड मिटर बसविण्यासाठी कार्यादेश देण्यात आलेले आहेत. या कृषी ग्राहकांना दीड लाख प्रिपेड मीटर बसविण्याची प्रक्रिया डिसेंबर महिन्यापर्यंत पूर्ण करण्यात येणार आहेत.